Rematado o curso chegan as merecidas vacacións: o mellor tempo para dedicar á lectura e ao cine (ademais de outras actividades e inactividades, claro). Aproveitemos estes días para ir ao cine e comprobar se nos gustan ou non as adaptacións cinematográficas dalgunhas obras literarias. Comezamos polas que xa non son novidade:
- Crepúsculo, de Catherine Hardwicke, adaptación da novela do mesmo título de Stephenie Meyer, conta a relación amorosa entre unha adolescente e un mozo vampiro, cos perigos que isto entraña.
- La brújula dorada, de Chris Weitz, adaptación da primeira entrega dunha triloxía de Philip Pullman. A historia xira entorno a unha nena que viaxa ao Polo para salvar a un grupo de rapaces, vítimas dunha organización.
- Slumdog Millionaire, está baseada na novela Q&A de Vikas Swarup. Conta a historia dun rapaz que se convirte en millonario grazas a un concurso de televisión.
E pasamos ás estreas:
- Corazón de tinta, de Iain Softley, adaptación da novela homónima de Cornelia Funke, a primeira dunha triloxía. Está protagonizada por un pai e a súa filla, dous grandes lectores, que teñen o poder de facer reais os personaxes das súas lecturas.
- Los hombres que no amaban a las mujeres, de Arden Oplev, primeira entrega da triloxía Millennium de Stieg Larsson. Presenta todos os elemntos que farán da película un éxito: trama detectivesca, asasinatos, corrupción...
- E proximamente teremos nos cines a sexta entrega de Harry Potter (O misterio do príncipe). Cita ineludible para os millóns de seguidores deste personaxe de J.K.Rowling, que marcou un antes e un despois na literatura xuvenil.
Finalmente unha recomendación moi especial : Los mundos de Coraline de Henry Selick, unha historia fascinante que mistura a inocencia, o humor e o macabro, ao máis puro estilo de Tim Burton. 
