A distribuidora Gallaeciacinema presenta na súa colección "Galicia de cine" unha selección dalgunhas das mellores curtametraxes do panorama cinematográfico galego. Os oito títulos que compoñen este DVD son:
1. A teoría do espello de Pedro Alonso Corredoira, unha historia que se integra dentro do xénero de ciencia ficción, e na que a morte resulta ser unha vía de fuxida da "máis cruenta das torturas: a memoria". O 31 de decembro do ano 2001, xusto un segundo antes da chegada do capicúa 2002, o tempo comeza a ir cara atrás.
2. Coruña imposible de Paco Rañal (1995), unha curta de dez minutos en B/N, na que o protagonista vive unha inesperada situación que vai da comicidade máis sinxela ao impactante final, nun angustioso pesadelo que non ten fin. Non vos perdades a sensación de vertixe das imaxes finais e a relación da historia cos espazos imposibles de M.C. Escher. 
3. El fruto del tedio de Rubén Coca (2001) conta a decisión de dous amigos de cambiar de banco no parque no que pasan o tempo, para así cambiar de perspectiva. Xa o título desvela a dificultade para romper coa rutina e tomar decisións realmente importantes.
4. Metamorfosis (2004) de Fran Estévez, baseada no conto de Franz Kafka, é unha curta que se centra na relación de Gregor Samsa (do que só se escoita a súa voz en off) e a súa irmá Gretel (á que corresponden as imaxes). Cunha estética claramente expresionista, a rodaxe durou oito días e o resultado é unha brillante combinación de imaxes e debuxos (do propio Estévez) en branco e negro e o paso á cor nas localizacións de exteriores.
5. Minas (2003) de Daniel de La Torre. A historia desenvólvese no ano 1938. Un soldado falanxista, fuxindo dunha emboscada, intérnase nun campo de minas. Caerá na trampa e entrará nuha espiral de medo, desesperación e soidade. Salienta na curta o bo facer do único actor que aparece en escea e a marabillosa voz de Uxía Senlle recreando o poema de Celso Emilio Ferreiro Eu en ti.
6. Minotauromaquia. Pablo no labirinto (2004) de Juan Pablo Etcheverry, con música de Stravinsky, unha recreación animada en plastilina do peculiar mundo pictórico de Picasso. Algunhas das figuras máis emblemáticas do Guernica, As señoritas de Aviñón, o neno vestido de pierrot e outros moitos deben fuxir do cruel e ameazante Minotauro que persegue a Pablo polo labirinto.
7. Os Crebinsky de Quique Otero (2002) co aire do cine mudo, presenta as aventuras e desventuras dunha estraña parella de irmáns, os Crebinsky, que viven da creba na Costa da Morte. Recollen na praia todo canto a marea achega á beira e un día comproban que están de sorte... É unha disparatada historia chea de humor na que a música tamén xoga un papel fundamental, e da que temos unha esperada continuación nuha longametraxe: Os Crebinsky. O filme.
8. Una luz encendida (1999), a novena curtametraxe de Alber Ponte (1999), é un drama protagonizado por unha parella nova, ilusionada por un premio millonario. Pero os cartos non son o máis importante nunha relación, e os soños pódense romper de moitas maneiras.
Calquera destas curtas merece a nosa atención tanto polas súas coidadas realizacións como polos temas que abordan: o paso do tempo, a soidade, a incomprensión, a inadaptación, a indecisión, a guerra, a supervivencia, o desengano, os soños... e tantas outras cuestións que a todos nos afectan nalgún momento da nosa vida.
